मारेगाव : मारेगांव पोलीस स्टेशन हद्दीत नवरगाव (धरण) येथे 26 मार्च 2024 रोजी घोंसा येथील प्रजोत मून (वय 21) याचा मृतदेह आढळून आला होता. या घटनेने तालुक्यात चांगलीच खळबळ उडाली होती. प्रजोतचा मृतदेह उत्तरीय तपासणीसाठी पाठविण्यात आल्यानंतर त्याने विष प्राशन केले असल्याचे प्राथमिक तपासातून समोर आले.
मात्र, प्रजोत चे वडील भिमराव मुन रा. रासा (ता.वणी) यांनी मारेगाव पोलीसात तक्रार दाखल करून आपल्या मुलाची आत्महत्या नसून त्याची हत्या झाल्याचे दिलेल्या तक्रारीतुन आरोप केला आहे. तक्रारीत असेही म्हटले आहे की, प्रजोत हा मंगळवारी 26 मार्च रोजी सकाळी साडे आठ वाजता घरून कामावर निघुन गेला. परंतु संध्याकाळपर्यंत तो घरी परत न आल्यामुळे त्यांनी त्याच्या मोबाईल वर संपर्क साधण्याचा प्रयत्न केला, परंतु त्याच्याकडून प्रतिसाद मिळाला नाही. त्यामुळे चिंतेत आलेल्या मून कुटुंबीयांनी दुसऱ्या दिवशी (ता.27 मार्च) ला वडील भिमराव मुन आणि त्यांचे दोन भाऊ वणी येथे प्रजोतच्या मित्रांना भेटून त्याच्याबाबत चौकशी करत होते. त्याची तक्रार देण्यासाठी गेले असता त्याच वेळी वणी पोलीसांनी त्यांना नवरगाव धरण (ता. मारेगाव) परिसरात एका अज्ञात व्यक्तीचा मृतदेह आढळल्याची माहिती दिली. भिमराव मुन आणि त्यांच्या बंधूंनी जाऊन मृतदेहाची बघितला असता तो प्रजोतच असल्याचे दिसून आले.
भिमराव मुन यांनी तक्रारीत पुढे असे म्हटले की, प्रजोतच्या जवळ विषारी द्रव्य मोनोशीलचा डब्बा आढळून आला आहे. त्यामुळे त्याच्या मुलाला विष पाजून हत्या केल्याचा संशय आहे. त्यामुळे प्रजोत याच्या मृत्यूची सत्यता शोधण्यासाठी त्याच्या मोबाइलवर आलेल्या आणि शेवटच्या क्षणापर्यंत झालेल्या संभाषणाचा तपास करावा. तसेच, हत्येचा गुन्हा सिद्ध झाल्यास आरोपींवर कठोर कारवाई करावी अशी मागणी केली आहे.
मारेगाव पोलीस स्टेशनचे नव्याने रुजू झालेले पोलीस निरीक्षक शंकर पांचाळ यांनी घटनेचे गांभीर्य लक्षात घेत सदर घटनेचा तपास पोलिस उपनिरीक्षक डॉ. ज्ञानेश्वर सावंत यांच्याकडे दिला असून या प्रकरणीतील प्रत्येक बाबींची बारकीने सखोल चौकशी करून, प्रत्येक गोष्टीवर तपास, स्पॉट पंचनामा योग्यरित्या केला जाईल आणि जे सत्य असेल ते समोर आणण्याचा प्रयत्न असेल, प्रजोत च्या मृत्यूचे कारण शोधण्यासाठी तपास सुरू आहे. त्याच्या मोबाईलचा तपासही केला जात आहे,असेंही त्यांनी सांगितले.